
میدیاى تورکیا: بڕیارە عەبدوڵڵا ئۆجەلان پەیامێکى ڤیدیۆیی بڵاوبکاتەوە.
پاش پەیامەکە زیندانیکراوانى پەکەکە ئازاد دەبن.
بە گوێرەی هەواڵێکی پێگەی "تە24"، مشتومڕ هەیە عەبدوڵا ئۆجەلان لەو شوێنەی تێیدا دەژی و لە کۆنفرانسێکی ڕۆژنامەوانیدا بانگەواز بۆ ئەندامانی پەکەکە بکات، بۆ ئەوەی بگەڕێنەوە بۆ باکووری کوردستان و تورکیا.
پێدەچێت بانگەوازەکە بەشێوەی ڕاستەخۆ لە میدیاکانەوە بگوازرێتەوە.
تاوەکو ئێستا ناوی ئەو ڕۆژنامەوان و میدیایانە یەکلانەکراوەتەوە، کە لەو کۆنفرانسە ڕۆژنامەوانییەکەدا بەشداردەبن.
پاش بانگەوازەکەی ئۆجەلان، یەکەم گرووپی زیندانیکراوان ئازاد دەبن.
دواتر گرووپێک لە ئەوروپاوە و گرووپێک لە قەندیلەوە دەگەڕێنەوە بۆ تورکیا.
بۆ ئەوەی ئۆجەلان بانگەوازەکەی بکات، پێویستە سەرەتا ئەنجوومەنی ئاسایشی نەتەوەیی تورکیا کۆببێتەوە و چەکدانانی پەکەکە پشتڕاست بکاتەوە، پاشان پشتڕاستکردنەوەکە بە واژۆی ڕەجەب تەیب ئەردۆغان، سەرۆککۆماری تورکیا بڵاوبکرێتەوە.
چاوەڕوان دەکرێت هەینی داهتوو کە دەکاتە 27ـی تشرینی دووەم، ئەنجوومەنەکە کۆببێتەوە.
هاتیمئۆغوڵڵاری: تورکیا و پەکەکە ئامادەکاری بۆ گەڕانەوەی ئەندامانی پەکەکە دەکەن