فەرمانى زەیدى بۆ پێکهێنانی بارەگای فەرماندەیی لە جورفولسەخر دەرچوو

پووختەى هەواڵ

  • سبەى هێزە ئەمنییەکانى عێراق لە جورفولسەخر دەستبەکار دەبن.

  • ڕۆژى هەینى دوایین وادەیە بۆ چۆڵکردنى جورفولسەخر لەلایەن حیزبوڵاوە.

  • بەرێوەبردنى ناوچەکانى جورفولسەخر بەسەر هێزە عێراقییەکاندا دابەشکراوە.

  • بارەگاکە بە پۆلیسى فیدراڵییەوە دەبەسترێتەوە و بەرپرسێک و دوو جێگرى دەبێت.


فەرماندەی گشتیی هێزە چەکدارەکانی عێراق فەرمانی دیوانی بۆ پێکهێنانی بارەگای فەرماندەیى -کۆنترۆڵکەر- لە ناوچەی جورفولسەخر -جورفولنەسر- دەرکرد و بڕیارە سبەی هەینی لە کاتژمێر شەشی بەیانییەوە دەستبەکار ببێت.


سەباح نوعمان، گوتەبێژی فەرماندەی گشتیی هێزە چەکدارەکانی عێراق:

لەسەر ڕاسپاردەی عەلی زەیدی، فەرمانی دیوانی بۆ پێکهێنانی بارەگای کۆنترۆڵ و باڵادەست لە جورفولسەخر -جورفولنەسر - دەرچووە.

پێکهاتە فەرماندەییەکە- بارەگاکە-:

  • بارەگاکە لە هەموو ڕووەکانەوە بە فەرماندەیی هێزەکانی پۆلیسی فیدراڵییەوە دەبەسترێتەوە.

  • سنووری کارەکانی دەکەوێتە ناو سنووری کارگێڕیی جورفولسەخرەوە.

  • فەریق ڕوکن ئەحمەد حاتەم حەمید وەک فەرماندەی بارەگاکە دەستنیشان کراوە و دوو جێگریشی بۆ دانراوە، کە بریتین لە:

  • لیوا ڕوکن حوسێن عەلی نسەیف، جێگر بۆ کاروباری بەرگری.

  • عودەی عەبدولئیمە مەسحەب، جێگر بۆ کاروباری حەشدی شەعبی.

ئەو هێزانەی دەخرێنە ژێر فەرمانی بارەگاکە:

لە فەرمانەکەدا هاتووە کە چوار پێکهاتەی ئەمنی و سەربازی بە بارەگای کۆنترۆڵەوە دەبەسترێنەوە، کە پێکهاتوون لە:

لیوایەک لە سوپای عێراق.

لیوایەک لە پۆلیسی فیدراڵی.

دوو لیوا لە دەستەی حەشدی شەعبی.

فەوجێک لە پۆلیسی وزە بۆ پاراستنى بۆرییە نەوتییەکانی ناوچەکە.

وادەی دەستبەکاربوون و هەماهەنگییەکان:

بڕیارە بارەگای کۆنترۆڵ لە کاتژمێر شەشی بەیانیی ڕۆژی 20ـی تشرینی دووەمی ٢٠٢٦ـەوە بکرێتەوە و ئەرکی فەرماندەیی و کۆنترۆڵکردنی سەرجەم ئەو یەکە ئەمنییانە بگرێتە ئەستۆ کە لەژێر فەرمانیدان.

بەگوێرەى فەرمانەکە، بارەگاکە بە بەرزترین ئاستی هەماهەنگی لەگەڵ هەریەک لە؛ فەرماندەیی پۆلیسی بابل و فەرماندەیی ئۆپراسیۆنەکانی کەربەلا، ئەنبار و بەغداد کار دەکات.

زانیاریى زیاتر بۆ تۆ:

پلانی بڵاوەپێکردنی هێزە ئەمنییەکان لە جورفولسەخر پەسەند کرا

کەناڵ8 وەک یەکەم میدیاى کوردى چووە ناو جورفولسەخر

Loading related news...